PERSONAL nga mitunol og Plaque of Appreciation ang mga representante sa Region 10 Judo Association kang Mayor Rolando ‘Klarex’ Uy, adlaw’ng Miyerkules, Setyembre 2, ning tuig, sa City Tourism Hall.

 

Lakip sa ilang gitunol mao ang resulta sa bag-ohay lang gipahigayon nga Higalaay Judo Tournament niadtong Agosto 21 hangtod 23 sa Nazareth Gymnasium, nga gipasiugdahan pinaagi sa koordinasyon sa City Sports Office nga gipangulohan ni Ms. Alby Cris Waga.

 

Gawas sa pagpresentar sa resulta sa kompetisyon, mihangyo usab ang asosasyon og dugang suporta gikan kang Mayor Klarex alang sa umaabot nga Batang Pinoy 2026 nga ipahigayon karong Disyembre sa Bacolod City.

 

Nahatagan usab sa Higalaay Judo Tournament og bililhong kahigayonan ang mga lokal nga atleta ug coaches nga makatigom og dugang kasinatian ug makakat-on gikan sa pipila sa mga nanguna nga judokas ug coaches sa nasud.

 

Matud pa, dili gusto ni Mayor Klarex nga limitahan ang pag-uswag sa sports sa siyudad. Mao kini ang hinungdan nga atol sa Higalaay Festival, iyang gipasiugda ang nagkalain-laing sports nga padayon nga nagtubo ug angay nga suportahan ug mapalambo sa siyudad. (MDS/CIO/Photos by: Harry Tibon/CIO)