MALIPAYON nga kasingkasing ang nabati ni Marina Galarido, usa ka 62 anyos nga molupyo sa Barangay Baikingon human naka-benepisyo sa exclusive People’s Day for solo parents, adlaw’ng Miyerkules, Septiyembre 2, diha sa City Tourism Hall, ning siyudad.

 

Si Nanay Marina, usa ka suman vendor sa Barangay Baikingon ug usa sa mga solo parent nga nakabenepisyo sa pinakaunang People’s Day alang kanila.

 

Gani man, malipayon siya nga nakadawat sa financial assistance ug lima ka kilo nga bugas nga personal nga donasyon mismo ni Mayor Klarex Uy.

 

Dili lalim iyang gi-agian isip solo parent sanglit nagsugod kini og panarbaho sukad namatay iyang bana siyam ka tuig na ang milabay isip Lumpia vendor ug nakatuon maghimo og suman samtang nagtrabaho kini aron lamang mabuhi iyang upat ka anak.

 

Ug sa tungatunga sa iyang panginabuhian, sa tuig 2024 siya adunay gihambin nga sakit sa kasingkasing nga giubanan sa high blood.

 

Apan bisan pa man niini, si Nanay Marina naningkamot nga makaabot sa City Hall alas 4:00 pa lamang sa buntag aron lang maka-apil sa People’s Day kauban ang iyang silingan nga usa usab ka solo parent.

 

Mapasalamaton si Nanay Marina nga nahatagan og bili ni Mayor Klarex Uy ang mga solo parent sama niya pinaagi sa People’s Day ug nanghinaut nga daghan pa ang matabangan pa ni Mayor Klarex Uy nga sama kaniya usa ka solo parent. (NLB/CIO/photos by Jhoanne Abejo/CIO)