DAKONG tabang ang nadawat ni Tatay Joselito Galoso, kini iyang gipaabot human nakadawat sa cash assistance atol sa People’s Day nga gipahigayun, adlaw’ng Lunes, Septiyembre 7, sa Pagatpat Elementary School, ning siyudad.

 

Si Tatay Joselito, 57 anyos, usa ka on-call baker sa Jonna’s Bakeshop ug aduna’y gihambin nga Diabetes sulod na sa duha ka tuig.

 

Nakaundang kini pagpanarbaho isip full-time baker tungod sa iyang sakit. Gani, siya nalipay human nakadawat sa cash assistance nga iyang gamiton alang sa iyang maintenance medication.

 

Gawas niini, siya usab tuyo nga miadto sa People’s Day kay wala na kini bugas sa ilang balay tungod sa kalisod nga nasinati.

 

Bisan pa man nga 11 pa lang ka tuig ang pagpuyo ni Tatay Joselito sa Cagayan de Oro ug gikan siya sa layong dapit, dako ang iyang pagpasalamat kay karon pa niya nabati ang ingon ani nga level sa pagpangga ug pagpakabana gikan sa usa ka mayor.

 

Nanghinaut si Tatay Joselito nga magpadayun ang People’s Day program aron mas daghan pang mga Kagay-anon nga nagkinahanglan og tabang sa gobyerno. (NLB/CIO/photo by Roel Felicitas/CIO)