ALAYON sa gitinguha nga kabag-ohan ug lig-on nga pagdumala sa Cogon market, gitigom sa mga kadagkuan sa City Economic Enterprises and Business Development Administration (CEEBDA) ang mga stallholders ug mga opisyales sa Blocks 1, 4, ug 6 sa 2nd floor sa nasangpit nga merkado.

 

Gipasabot ni acting General Manager Jocelyn Peñalosa nga tumong sa maong asembliya nga mapasabot ngadto sa mga market vendors ang mga lagda ug polisiya nga gipatuman karon sulod sa merkado.

 

Usa sa mga mahinungdanong gihisgutan mao ang pagmintinar sa kalimpiyo sa palibot pinaagi sa insakto nga paglabay ug pagdumala sa basura, paghawan sa mga agianan.

 

Lakip na usab niini ang seguridad sa merkado, pagdili sa wala gitugot nga stall extension, ambulant vendors, ug uban pang mga lakang alang sa kahapsay ug kalinaw.

 

Sa maong panagtigum, giduso sa mga stallholders ug CEEBDA ang hugot nga pakigtambayayong alang sa laraw nga pagpaanindot ug pagpalambo sa merkado sa Cogon. Ang asembliya gidumala nila ni Temoteo L. Chavez, Cogon Market branch manager, ug sa mga opisyal sa CEEBDA. (ALR/CIO/Photos from CEEBDA)