DAKONG garbo sa LGU-CDO human nasungkit sa City Nutrition Committee ang ‘First Year CROWN Maintenance Award’ uban ang cash prize nga balor og P100,000 niadtong Marso 23 atol sa National Nutrition Awarding Ceremony didto sa Hilton Hotel, Pasay.

 

Si City Nutrition Action Officer Nenita F. Rabe isip representante ni City Nutrition Committee Chairperson Mayor Oscar Moreno ang midawat sa award, uban ni National Nutrition Council X Nutrition Program Coordinator Gladys Mae S. Fernandez.

 

Ang First Year CROWN Maintenance Award gihukman sa Inter-Agency National Nutrition Evaluation Team ug gipresenta ngadto sa local government units nga nakakuha sa minimum required score alang sa epektibo nga nutrition program management.

 

Sa susamang kalihokan, gipasidunggan usab sa National Nutrition Council (NNC) si CNAO Nenita F. Rabe isip pinakaunang National Outstanding Nutrition Action Officer Awardee.

 

Siya ang napili sa lima ka contenders gikan sa nagdaiyang rehiyon alang sa 'Search for National Local Nutrition Focal Point.' (NLB/CIO/Photos courtesy of CNC)