GILUSAD na sa City Tourism and Cultural Affairs Office ang Tourism Management Information System alang sa regular nga pag-monitor sa mga tourism-related establishments, tourist sites, ug Meeting, Incentives, Conferences, and Exhibitions (MICE) venues.

 

Ang Tourism Management Information System usa ka website diin mahimo nang magpasa pinaagi sa online platform ang mga establisemento sa mga datos nga gikinahanglan i-report sa lokal nga kagamhanan sama sa ihap sa mga kliyente, mga kwarto nga gi-abangan, mga events nga gipahigayon, ug uban pang impormasyon.

 

 

Gikalipay sa mga stakeholders ang maong kabag-ohan tungod kay mas gipasayon na ang monitoring karon sa mga establisemento hilabi na nga dili na kinahanglan nga personal nga moanhi sa buhatan sa City Tourism alang sa pagpasa sa maong datos.

Kahinumduman nga usa sa mga rekisito sa business permit renewal ang regular nga pagpasa sa mga datos nga makatabang sa pag-monitor sa mga turista nga gabisita, lakip usab ang pagsuta kung aduna bay mga dagkong kalihukan nga ipahigayon dinhi sa dakbayan.

 

 

Aron makarehistro sa Tourism Management Information System, mahimong bisitahon ang Tourism Cagayan de Oro Facebook page alang sa dugang detalye sa maong website. (SPP)