Wednesday, 30 March 2022 00:19

Mayor Moreno gipasabot ang pag-veto sa renewal sa prangkisa sa cockpit arena

Written by
Gitubag ni Mayor Oscar Moreno ang mga pagsaway sa iyang desisyon nga gi-veto ang usa ka ordinansa nga mag-renew sa prangkisa sa operasyon sa usa ka cockpit arena kon bulangan dinhi sa Cagayan de Oro niadtong bulan sa Enero ning tuig.
 
Nag-unang rason kon nganong gi-veto ni Mayor Moreno ang City Ordinance No. 14212-2021 tungod sa tuyo nga mapugngan ang laing hugna sa pagsaka sa mga kaso sa Covid-19 kon ‘surge’ niadtong panahona, diin misaka gayud kini sa sobra libo ang ihap sa mga kaso matag semana pag-abot sunod bulan sa Pebrero dinhi sa dakbayan.
 
Sumala pa ni Mayor Moreno nga iyang gi-veto ang maong ordinansa tungod kay gasaka ang average weekly COVID-19 cases niadtong panahoha, gikan sa unom ka kaso sa hinapos sa bulan sa Disyembre 2021 ngadto na sa 1,444 weekly cases pag-abot sa Pebrero 7, 2022.
 
Namahayag ang mayor nga dili siya makatugot nga ma-expose sa coronavirus sa walay igong hinungdan ang mga katawhan ug bisita sa syudad.
 
“I cannot afford to allow our people to be exposed unnecessarily to the virus,” pahayag sa mayor sa iyang sulat ngadto kang Vice Mayor Kikang Uy niadto Enero 4, 2022.
Dugtong pa ni Mayor Moreno nga dili ikalimod nga ang mga bulangan usa ka ‘crowded areas’ kon gadugokan sa mga sugarol, ug daghan kanila mga senior citizens.
 
Ang pamahayag gihimo sa mayor human mipagula og press statement agi’g tubag sa mga Facebook posts diin nag-ingon matud pa nga napakyas ang mayor paghatag og katin-awan o’ igong basihanan kon nganong iyang gi-veto ang pag-renew sa prangkisa sa Canitoan-Pagatpat cockpit arena niadtong Enero 4 ning tuig.
 
Dugang pa sa mayor nga kung wala niya gi-veto ang ordinansa niadtong panahona, hayan nga mosaka pa ang mga kaso sa Cagayan de Oro tungod kay ang virus paspas makatakod, ilabina sa mga ‘crowded’ nga lugar sama sa bulangan.
Gawas pa, gidid-an pa sa IATF kon Inter-Agency Task Force ang pagpahigayon sa sabong kon cockfighting niadtong panahona, panapos ni Mayor Moreno. (IAF/CIO)