MIABOT na ang crematorium machine nga gamiton alang sa City Memorial Park ning syudad. Matud ni Sol P. Mosqueda, focal person sa City Memorial redevelopment project ug personahe sa City Local Environment and Natural Resources Office (Clenro), nga kabahin sa P367 million project ang bag-ong crematorium machine nga gipalit sa LGU CDO ubos sa administrasyon ni Mayor Oscar Moreno.

 

Dugang ni Mosqueda nga laumang buksan na ang crematorium services sa City Memorial Park sa katapusang semana sa Abril o unang semana sa Mayo human sa 8-14 ka adlaw nga installation ug testing process.

 

Samtang gibutyag ni Engr. Armen Cuenca, Clenro department head ug miyembro sa City Memorial Park Board, nga gipaabot usab ang pag-abot sa duha ka funeral cars nga gipalit sa syudad dungan sa pagbukas sa crematorium.

 

Lakip sa serbisyo sa City Memorial Park o kanhi Bolonsori public cemetery mao ang embalming services ug ang viewing chapel diin adunay 12 ka mga luna nga mahimong maggamit panahon sa haya. (ACM/CIO) Photos by ARMAN CAAYAMAN, Clenro