Wednesday, 25 March 2020 07:48

Unang kaso sa COVID-19 sa CdeO, gikonpirma sa DOH 10

Written by

MAS gipahugtan ug gipalapdan pa sa Department of Health X ug Barangay Health Emergency Response Team (BHERTS) sa syudad ang 'contact tracing' niadtong mga tawo nga adunay ‘close contact’ sa usa ka kompirmadong coronavirus disease o COVID-19 patient sa Cagayan de Oro nga kasamtangang na-admit karon sa Northern Mindanao Medical Center (NMMC).

Kini ang gibutyag ni Dr. Dave Mendoza, assistant regional director sa DOH X atol sa daily press briefing sa City Mayor's Office, Marso 25 ning tuig.

Sigun pa sa taho, ang maong COVID-19 patient padayong nagpa-alim karon sa NMMC, ang nag-inusarang referral hospital sa COVID-19 patients sa tibook Northern Mindanao.

Ang pasyente usa ka 71 anyos nga lalaki ug molupyo sa usa sa mga numbered barangays sa dakbayan sa Cagayan de Oro.

Ang maong pasyente adunay history of travel gikan sa Manila niadtong Marso 7, ug miuli sa Cagayan de Oro niadtong Marso 12, ug na-admit sa NMMC niadtong Marso 16 gumikan sa hilanat, takig ug grabe nga ubo.

Naghambin usab kini og daan nang mga balatian sama sa hypertension, benign prostatic hyperplasia ug chronic cardiac diseases.

Dugang pa ni Dr. Mendoza nga mismo ang pamilya sa nasangpit nga pasyente mi-kooperar alang sa safety precautions sa pagtratar sa ilang kabanay nga adunay COVID-19.

Nagpahimangno usab si Dr. Mendoza kalabot sa 'confidentiality' mahitungod sa impormasyon sa usa ka COVID-19 patient, busa limitado lang ang ilang ginabutyag.

Apan gisiguro niini nga gitutukan na ang 'contact tracing' aron mapugngan ang pagkaylap sa sakit.

By Archie Pagayaman / photo by Roel Felicitas