MAPASALAMATON ang mga ginikanan sa mga batang adunay kabilinggan sa panglawas kon persons with disability sa mga serbisyo ug suporta nga ilang natagamtaman sulod sa tulo ka termino ni Mayor Oscar Moreno, inubanan sa hugot nga paningkamot sa City Social Welfare and Development PWD Section.

 

 

Si Vivian T. Ravina, ginikanan sa bata nga aduna'y Down Syndrome ug molupyo sa Barangay Puntod, usa lang sa daghan natabangan sa CSWD PWD Section.

 

Tipik niini ang libreng PWD sensitivity training alang sa mga ginikanan nunot sa pag-atiman sa mga children with special needs; tinuig nga educational assistance kon gitawag og Tuloy Aral Walang Sagabal (TAWAG) alang sa pinili nga children with disability; therapy assistance; pagduyog sa nagkadaiyang kalihokan kalabot sa PWD ug uban pa.

 

 

Kahinumduman nasakmit sa LGU-CDO ang labing unang ‘Digital CitiesPH Award’ ang ikaduhang ganti alang sa entry nga ‘Persons With Disabilities Online ID Registration' niadtong tuig 2018.

 

Gawas niini, gilusad usab sa LGU-CDO ang tinuig nga ‘Search for PWD-Friendly barangay’ niadtong tuig 2019 isip pamaagi sa pagdasig sa mga kabaranggayan sa pagprotehir sa mga katungod sa PWD.

 

Sa susamang tuig, gipalabang usab sa 19th city council ang 'Anti-Discrimination Ordinance' pinaagi ni Committee on Social Services Chairperson City Councilor Girlie Balaba aron masumpo ang diskriminasyon sa mga PWDs.

Sumala sa datos sa CSWD PWD Section, mikabat na 7,785 as of Disyembre 2021 ang narehistro sa PWD program sa LGU-CDO.

 

Alang sa mga aduna'y kaila og miyembro sa pamilya nga PWD nga wala pa'y ID, pwede ninyo sila irehistro pinaagi niini nga link: https://services.cagayandeoro.gov.ph/pwd/ (NLB/CIO/Photos taken during pre-pandemic, courtesy of CSWD)