Gipasalig ni Mayor Rolando `Klarex’ Uy nga atimanon ug hatagan sa igong pagtagad ang mga programa sa agrikultura human gipresentar sa Agricultural Productivity Operations Office (APOO) ang ilang prayoridad sa unang 100 days sa Klarex administration.

 

“Usa sa programa nga akong patutukan ang agriculture kay anaa sa farming ang maayo nga negosyo ug income,” pamahayag ni Mayor Klarex.

Sa maong okasyon, gipresentar ni Engr. Mae Ann C. Timoteo, Chief, Agri-Engineering Division sa APOO, ang nagkadaiyang mga programa nga kasamtangang gipatuman ug ang mga kalambuan niini.

Kini nga mga kalambuan ang gikalipay ni Mayor Klarex human usab iyang nasayran nga ubay-ubay na sa mga mag-uuma sa syudad ang nahatagan og kahigayonan nga makapili og alternatibo nga pagpanguma pinaagi sa mga seminars ug orientations nga gihimo sa APOO.

 

 

Gani, gidasig ni Mayor Klarex ang APOO, uban ni City Councilor Jay Roa Pascual, chairman sa committee on agriculture sa city council, nga mag-benchmarking sa usa ka malampuson nga farm sa free-range chicken aron ma-replicate kini sa syudad.

 

“Maayo gyud ang farming basta suportahan lang usab sa gobyerno,” dugtong pa sa mayor.

Lakip na niini ang pagtubag sa mga nag-unang issues kalabot sa Food Security; Inorganic Fertilizer Crisis; Irrigation Issues, ug Data Management sa tinguha nga mas mapasayon ang pag-ila sa mga mag-uuma ug ang ilang panginahanglanon. (ALR/CIO/Photos by Roel Felicitas/CIO)