PERSONAL nga gitunol kagahapon, Septiyembre 5 ni Mr. Delio A. Aseron II, Regional Vice President sa Philhealth Regional Office 10 ang accreditation certificate sa Lumbia Infirmary isip Philhealth KonSulTa (Konsultang Sulit at Tama) package provider nga gidumala sa administrasyon ni Mayor Klarex Uy.

 

Sumala ni Aseron, malipayon kini nga nadugangan pa ang Konsulta health facility provider sa syudad nga nakatutok sa preventive package ubos sa Universal Health Care program, diin mahimong mapahimuslan sa mokabat 30 mil nga katawhan sa barangay Lumbia, ingon man kasikbit nga mga lugar.

 

Ang Philhealth konsulta package ang mas gipaladpan nga primary care benefits ubos sa UHC sa katuyoan nga maghatag og outpatient health services sa katawhan sama sa primary care services, select laboratory & diagnostic examination ug select drugs & medicines. .

 

Sa laing bahin, gihingusgan ni City Councilor Maria Lourdes S. Gaane, chairperson sa Committee on Health and Health Insurance, nga kini nagpakita sa paninguha sa kagamhanang lokal uban sa suporta sa Department of Health, Philhealth ug mga healthcare facilites nga mapalambo ang paghatag og accessible, affordable ug dekalidad nga serbisyo sa panglawas sa katawhan.(AGP/Photos by Rod Constantino/CIO)