MASIGARBOHON ang LGU-CDO human napili si City Scholarships Office Head Richel Petalcurin-Dahay isip usa sa 13 ka Pinoy nga mosalmot sa Governance and Society Institute of the Young Southeast Asian Leaders Initiative Professional Fellows Program (YSEALI PFP) nga gipaluyohan sa U.S. Department of State’s Bureau of Educational and Cultural Affairs.

 

Ang YSEALI PFP naghatag og oportunidad sa mga promising young professionals diin si Dahay mamahimong parte sa usa ka prestihiyosong network sa young professionals gikan sa 11 ka nasud sa Southeast Asia.

Ang mga inisyatiba ni Dahay sa City Scholarship Program ug adbokasiya sa youth empowerment ug good governance ang dakong naka-ambag aron siya mapili sa maong unom ka semana nga programa.

 

Tipik sa programa ang immersion ni Dahay sa education programs ug mga polisiya sa host state, lakip ang pag-promote sa Cagayan de Oro ug pagdala sa iyang mga nakat-onan ug kasinatian aron mapalambo ang education agenda sa LGU-CDO.

 

Tutokan usab ni Dahay ang posibilidad nga makutay ‘sisterhood' tali sa Atlanta City ug siyudad sa Cagayan de Oro alang sa umalabot nga learning exchanges ug partnerships.

Gilaumang molarga si Dahay karong Septiyembre 12.

 

Gawas ni Dahay, mi-qualify usab si City Scholar Liam Aiken Osorio ubos sa Academic Fellowship o’ student category, diin iyang i-representa ang nasud ug siyudad karong Oktobre ubos usab sa YSEALI program.

 

Si Osorio nahimong national awardee sa Ten Outstanding Youth in the Philippines human nakamugna sa usa ka non-government organization nga nagtabang sa mga trisikad drivers panahon sa pandemya kon gitawag og 'Tabang Sikad', ug nangulo sa city scholars organizations sa barangay Carmen. (NLB/CIO/Photo courtesy of Dahay)