MITANYAG ang Regulatory Compliance Board (RCB) sa ilang serbisyo ngadto sa mga residente ug establisemento diha sa Brgy. Balubal atol sa gipahigayon nga “Klarex nga Serbisyo sa Baryo” ni Mayor Rolando ‘Klarex’ Uy niadtong Septiyembre 8.

 

Gilangkuban sa paghatag og assistance sa mga business owners alang sa paglukat og business permit ug pag-adto sa mga tindahan mismo aron magpahibalo sa mga kinahanglanon ug proseso ang gitanyag nga serbisyo sa RCB atol sa kalihukan.

 

 

Ang malampuson nga pagtabang sa mga business owners aron marehistro ang ilang tagsa-tagsa ka negosyo nahimong posible human nagtinabangay ang pwersa sa Business Permit and Licensing Division ug Regulatory Compliance Board.

Tungod sa maong inisyatiba, mikabat sa katorse (14) ka mga business owners ang nahatagan sa higayon nga makalukat sa business permit diha mismo sa ilang barangay ug dili na kinahanglan nga mobiyahe padulong sa city hall.

 

Magpadayon ang pagtanyag sa mga serbisyo nga susama sa gihatag sa Regulatory Compliance Board diha sa nagkadaiyang barangay sa dakbayan atol sa matag-semana nga “Klarex nga Serbisyo sa Baryo (KSB)” nga gipasiugdahan sa administrasyon ni Mayor Rolando “Klarex” Uy. (SPPalen/Photos by Reynan Baylin)