Ubay-ubay ka mga residente sa barangay Balubal ning syudad ang naserbisyohan sa City Civil Registry, City Social Welfare and Development Department ug Human Resource Management Office (HRMO) atol sa 'Klarex nga Serbisyo sa Baryo' bag-ohay lang.
Mikabat sa 46 ka magtiayon ang gikasal ni Mayor Klarex Uy sa ‘Kasalan ng Bayan’, samtang 81 ang naalagaran sa correction of entries and gender, late ug newborn birth registration.
Mitunol usab ang CSWD sa ilang serbisyo alang sa mga senior citizens, solo parents ug PWDs, apil ang mental health ug scholarship program, samtang gitabangan sa HRMO ang mga indibidwal nga interesadong magkuha og board exams.
Tumong sa 'Klarex nga Serbisyo sa Baryo' nga mahatud sa administrasyon ni Mayor Klarex Uy ang mga batakang serbisyo diha mismo sa tugkaran sa kabarangayan. (NLB/CIO/photos by Rod Constantino/CIO).