Thursday, 15 September 2022 00:00

‘PinasLakas’ vaccination anaa na sa 81.54% sa seniors ug 40.14% booster sa 12 pataas

Written by
MOKABAT sa 81.54% o’ 49,036 ka senior citizens ang nakakompleto na sa primary COVID-19 vaccine series, samtang 40.14% o’ 182,719 ka indibidwal nga nag-edad 12 anyos pataas ang nahatagan sa first booster shot sa Cagayan de Oro.
Kini sigon pa sa datos sa City Health Insurance Office – Data Management Group, Septiyembre 14 alayon sa ‘PinasLakas’ vaccination and booster campaign.
 
Subay sa presidential directives sa first 100 days sukad paglingkod ni President Ferdinand Marcos Jr., target makab-ot sa syudad ang 90% primary vaccine coverage sa senior citizens ug 50% usab nga first booster dose coverage sa 12 anyos pataas sa dili pa muabot ang Oktubre 8 ning tuig.
 
Tungod niini, padayong nanawagan si Mayor Rolando ‘Klarex’ Uy sa hugot nga suporta sa katawhan ingon man sa mga opisyales sa matag barangay alang sa COVID-19 vaccination program.
 
Kahinumduman niadtong Septiyembre 2, nanumpa ug milagda sa ‘pledge of commitment’ sa PinasLakas Bayanihan ang mga kapitanes ug opisyales sa barangay alang sa kalampusan sa programa sa pagpamakuna. (AGP/Infographics by Roderic Constantino/CIO)