Sa tinguha nga mahatagan og igong panginabuhian ang mga molupyo sa nagkadaiyang relocation sites, prayoridad ni Mayor Rolando `Klarex’ Uy ang mga Homeowners Association (HOAs).

 

“Makig-istorya ko sa inyong presidenti para mahatagan kamo og dakong kahigayonan nga makapanginabuhi,” pamahayag ni Mayor Klarex ngadto sa mga opisyales sa 11 ka HOAs atol sa ilang pagpanumpa sa mayor adlaw’ng Martes, Sept. 13.

 

Apan kanunay gipahinumdum sa mayor nga ang mga HOAs ang magpili sa matang sa panginabuhian nga ilang gusto ug makaya himoon aron masiguro nga molambo ug molungtad sa ilang pagdumala.

 

Kini nga kalambuan ang gikalipay sa mga HOAs diin mapasalamaton sila kang Mayor Klarex nga usa sila sa mahatagan og kahigayonan nga makapamaligya sa higayon nga mabalik ug maplastar na sa insaktong lugar ang night café.

 

Una nang gipasalig ni Mayor Klarex nga ibalik niya ang night café apan ipahimutang kini sa insakto nga lugar aron dili makabalda sa dagan sa trapiko, mga sumasakay ilabina sa katawhan mismo.

Hinuon, wala pa gibutyag sa mayor kung kanus-a mabalik ug asa ipahimutang ang night café apan kamulo na ang paghan-ay niini. (ALR/CIO/Photo by Roel Felicitas/CIO)