GISAAD ni Mayor Rolando “Klarex” Uy ang ang usa ka rescue vehicle alang sa Brgy Tagpangi sa bulan sa Oktubre ning tuig.

 

Kini ang gibutyag ni Mayor Klarex atol sa gipahigayo’ng “Klarex nga Serbisyo sa Baryo” sa Brgy Tagpangi adlaw’ng Huwebes, Septiyembre 15 diin tibuok serbisyo sa City Hall ang gipaduol sa katawhan sa maong barangay.

Tumong sa mayor nga mapasayon ang pagdala sa mga pasyente ug mga nanginahanglan og tabang sa hospital ug paghikling sa mga apektado sa bisan unsang kalamidad.

 

Samtang gisaad usab ni Mayor Klarex ang pagtul-id sa kadalanan sa kabukiran nga bahin ning syudad nga inanay’ng naguba aron mas mapasayon ug mapadali ang kalamboan sa maong mga dapit.

 

Matud sa mayor angayan lamang tutokan na usab ang pag-atiman sa kadalanan o ‘road repair’ nga una nang nasemento panahon nga kongresista pa kini sa Distrito 1 sa nanglabay’ng katuigan.

 

Ang pagdala sa “Klarex nga Serbisyo sa Baryo” sa mga tanang barangay ning syudad usa usa ka kahigayonan nga masusi ug masuta ang nagkalain-laing panginahanglanon sa mga barangay. (ACM/Photos by ROD CONSTANTINO/CIO)