Mapasalamaton ang mokabat 128 ka molupyo sa Barangay Taglimao kang Mayor Rolando `Klarex’ Uy human sila naalagaran sa nagkadaiyang buhatan sa city hall pinaagi sa `Klarex nga Serbisyo sa Baryo’ program Huwebes, Sept. 22.

 

Ang maong mga indibidwal pipila lamang sa mga molupyo sa Brgy. Tagpangi nga naalagaran sa buhatan sa East-Westbound Terminal & Public Market (EWTPM), City Economic Enterprises Department (CEED), City Housing & Urban Development Department (CHUDD), Roads and Traffic Administration (RTA) ingon man Cagayan de Oro City Police Office (Cocpo).

 

Ang mga serbisyo nga nahatag sa EWTPM mao ang pagpasabot sa mga molupyo kalabot sa kamahinungdanon ug kagamitan sa Black Soldier Fly (BSF). Nang-apod-apod usab sila og mga utanon ug prutas ngadto sa 78 ka indibidwal.

Samtang gikalipay sa unom ka indibidwal nga mahatagan sila og higayon nga makabaton og puwesto ug makapamaligya sa nagkadaiyang merkado human sila miduol sa CEED ug na-profile.

 

Laing mga indibidwal ang miduol sa CHUDD sa tinguha nga makapahimulos sa housing program. Gi-settle usab sa duha ka mga indibidwal ang ilang mga traffic violations sa RTA ug nakahigayon pagkuha og police clearance ang 18 ka tawo sa buhatan sa Cocpo.

 

Kini nga mga pag-alagad ang gikalipay ni Mayor Klarex diin iyang gipasalamatan ang tanang department managers sa nagkadaiyang buhatan nga nagsuporta sa iyang programa pinaagi sa paghatag sa ilang mga serbisyo ngadto sa katawhan aron ipaduol ang gobyerno sa katawhan ug ang katawhan duol usab sa gobyerno. (ALR/CIO/Photos by Rod Constantino/CIO)