KOMPLETO ug nahuman na ang master plan sa Cagayan de Oro City mass transportation ug andam na kining isumite ngadto sa konseho ning syudad alang sa review ug pagpalabang sa usa ka ordinansa.

 

Ang pagpanday sa mass transport master plan natuman human giaprobahan ang local public transport route plan kon LPTRP sa ahensya sa Department of Transportation kon DOTR.

 

Sigun pa ni Engr. Nonito Oclarit, ang hepe sa Road Traffic Administration (RTA), adunay 78 ka mga rota sa pampublikong sakyanan sa tibook Cagayan de Oro ang nalatid sa local public transport route plan, mas daghan kon itandi sa kasamtangang 53 ka mga rota.

 

Nakita sa maong master plan nga daghan pang mga dapit ug lokasyon sa syudad ang adunay kakulangon o kawad-on sa public transport, pasabot ni Engr. Oclarit.

 

Kini nga kahimtang ang hinungdan kon nganong midaghan o misaka ang gidaghanon sa ‘illegal mass transport’ sama sa tri-cabs ug ‘habal-habal’ kon motorcycle-for-hire, dugang pa ni Oclarit.

 

Pinaagi sa LPTRP, maserbisyohan og rota ang mga lagyong kabarangayan sa bukid sama sa barangay Besigan ug Tumpagon.

 

Gihulat na lang sa mga kadagkoan sa RTA ang guidelines kon gabayan nga ipagula sa Land Transportation Franchising & Regulatory Board alang sa hingpit nga pagpatuman sa LPTRP, panapos ni Oclarit. (IAF-CIO)