Monday, 26 September 2022 08:33

2 ka covered court tukoron sa Brgy Taglimao

Written by
DAKONG garbo ug kalipay ang gibati sa molupyo sa Brgy Taglimao sa programa ug proyekto gikan ni Mayor Rolando “Klarex” Uy ingon man sa mga serbisyo sa City Hall nga gidala mismo sa ilang tugkaran adlaw’ng Huwebes, September 22.
 
Sa mensahe ni Mayor Klarex, iyang gipasalig ang pagpatukod og duha ka covered court alang sa public elementary ug secondary schools sa Brgy Taglimao alang sa kasayon ug proteksiyon sa mga estudyante ug mga magtutudlo.
 
Matud ni Mayor Klarex dako ang iyang kasubo tungod kay wala mabutangi og covered court ang maong barangay bisan pa man sa iyang termino nga kanhi kongresista sa Distrito 1.
 
Gipasabot sa mayor nga dako ang iyang pasalamat nga nadala ang “Klarex nga Serbisyo sa Baryo” sa Brgy Taglimao ug nakita ug nasinati niya ug sa tibuok bureaucracy sa City Hall ang sitwasyon sa mga kabataan ug mga magtutudlo.
 
Tungod niini, dako ang kalipay ug pasalamat sa mga residente sa pagpangulo ni Punong Brgy Ruben Obsioma sa proyekto nga ihatag sa ilang barangay. (ACM/Photos by ROD CONSTANTINO/CIO)