GILUSAD karong adlawa, Septiyembre 26 sa kagamhanang lokal sa Cagayan de Oro pinangulohan ni Mayor Rolando ‘Klarex’ Uy, Department of Health Region 10 uban sa suporta sa barangay Puntod ang ‘CDO PinasLakas Special Vaccination Days - Bakunahang Bayan’ sa Puntod covered court.

 

Ang ‘Bakunahang Bayan’ o nationwide COVID-19 vaccination and booster campaign molungtad sugod Septiyembre 26 ngadto 30 ning tuig sa nagkadaiyang mga vaccination centers nga gidumala sa syudad, ingon man sa DOH region 10.

Atol sa launching ceremony, gihingusgan ni Dr. Rachel Daba-Dilla, City Health Officer, nga dili angay kahadlokan ang unsa man nga klase nga bakuna, lakip na ang bakuna batok COVID-19.

 

Gani, dugang pa ni Dr. Dilla daghan na nga mga sakit ang nasumpo sa pagkuyanap tungod sa lapad nga pagpamakuna.

Sama na lang sa sakit nga tuberculosis, measles, flu, typhoid, cholera, small pox, polio ug uban pa.

 

Gibutyag usab ni Dr. Ina Grace Chiu, medical coordinator sa National Immunization Program sa CHO, nga kapin lima ka libo pa ka mga senior citizens sa syudad ang target mahatagan og second doses atol sa Bakunahang Bayan.

 

Alang sa buot magpabakuna sa Special Vaccination Days, adunay libre nga 3 ka kilo nga bugas ug usa ka bulan nga supply sa multivitamins ang tanang senior citizens nga magpabakuna, lakip ang tanang 12 anyos pataas nga magpatupok sa ilang first booster dose, samtang ang mga bata 5 ngadto 11 anyos adunay ihatag nga multivitamins syrup.

 

Misalmot usab sa aktibidad si DOH 10 Regional Director Dr. Jose R. Llacuna Jr. nga gipunting ang importansya sa COVID-19 vaccines aron malikay sa ‘severe symptoms’ hinungdan sa kamatayon kon ugaling matakboyan sa COVID.

 

 

Anaa usab si Councilor Dra. Maria Lourdes S. Gaane, chairperson sa Committee on Health and Health Insurance sa konseho, kinsa nagpasalamat sa padayon nga suporta sa mga opisyales sa barangay, Barangay Health Workers, Barangay Nutrition Scholars, Community Development Volunteers ug tanang mga volunteers sa komunidad sa kalampusan sa tanang programa sa panglawas sa nasudnon ug lokal nga kagamhanan. (AGP/Photos by Jay Arancon/CIO)