Wednesday, 28 September 2022 05:52

P8.289 billion Annual Investment Program aprobado na

Written by
APROBADO na sa City Development Council ang Annual Investment Program (AIP) sa Cagayan de Oro alang sa tuig 2023 atol sa CDC Full Council Meeting adlaw’ng Martes, Septiyembre 27 ning tuig sa usa ka hotel ning syudad.
 
Mokabat sa P8.289 billion ang kinahanglanong pundo aron mapatuman sa administrasyon ni Mayor Rolando “Klarex” Uy ang mga proyekto ug programa ubos sa social development services, economic development services ug general development services.
 
Kini naka-angkla ilawom sa ‘platform of governance’ ni Mayor Klarex nga ‘RISE CDO’ Development Agenda kon Regional Leadership; Institutional Development and Participatory Governance; Safety, Security and Human Development; ug Economic Recovery.
 
Sa maong AIP, 43% o P3.561 billion ang gigahin alang sa Economic Development and Recovery diin tumong ni Mayor Klarex nga matutokan ang paglambo sa syudad human makasinati sa epekto sa COVID 19 pandemic sulod sa milabay’ng 2 ka tuig.
 
Anaa usab sa 39% o P3.260 billion alang sa Social Development Services ug 18% o P1.467 billion usab alang sa General Development Services.
 
Ang 11th CDC Full Council meeting gitambongan ni 2nd District Rep. Rufus Rodriguez, Vice Mayor Jocelyn Rodriguez, city councilors, mga bag-ong accredited nga civil society organizations, punong barangays, ug city hall department managers sa pagpangandam ug presentasyon usab sa City Planning and Development Office ubos sa liderato ni EnP Ramir Balquin. (ACM/Photos by Rod Constantino/CIO)