IPAHIGAYON karong Oktubre 29 ning tuig ang ‘Search for Mr. & Ms. Cooperative Region 10 2022’ alayon sa kasaulogan sa bulan sa Oktubre isip ‘Cooperative Month’ nga pasiugdahan sa Regional Cooperative Development Council Region 10, Cooperative Development Authority – X uban sa pag-abag sa kagamhanang lokal sa Cagayan de Oro pinangulohan ni Mayor Rolando ‘Klarex’ Uy.

 

Ang ‘Mr. & Ms. Cooperative Region 10’ nga ipahigayon sa Xavier University gym ning syudad tipik lamang sa nagkadiayang kalihukan alang sa Coop Month uban sa tema, ‘KooPinas: Nagkakaisang lakas para sa makabuluhan at sama-samang pag-unlad’.

 

Muabot sa walo ka mga pares gikan sa nagkalain-laing kooperatiba sa tibuok rehiyon ang mosalmot sa nasangpit nga kalihukan.

 

 

Dumduman niadtong Oktubre 15 gipaila-ila ang mga kandidato ug kandidata atol sa ‘press conference’ nga gipasiugdahan sa RCDC 10, CDA 10, uban sa tabang sa Community Improvement Division sa city hall ug sa suporta usab ni City Councilor Imee Rose Moreno, chairperson sa Committee on Cooperative sa 20th city council. (AGP/Photos by Rod Constantino/CIO)