ALANG sa kasayon sa mga mobisita sa City Memorial Park o kanhi Bolonsiri cemetery, magtanyag ang kagamhanang lokal og libreng sakay pasulod sa maong sementeryo sugod Oktubre 31 ug Nobyembre 1 ilabina kadtong mga senior citizens, mga bata, PWDs ug sa tanan.

 

Kini tungod kay ipatuman na man usab sa syudad ang “No Entry” policy alang sa mga pribado ug pampublikong sakyanan pagsulod sa Bolonsiri cemetery, gawas lamang niadtong mga molupyo sa maong lugar.

 

Sa inisyal nga panagtagbo sa kagamhanang lokal kauban ang mga representante sa mga pribadong sementeryo, nagtanyag usab og libre’ng sakay ang Eternal Gardens ug Golden Haven sa Brgy Bulua.

 

Una nang gipahibalo sa syudad nga bukas na ang mga pribado ug pampublikong sementeryo alang niadtong mga mobisita sa ilang mga mahal sa kinabuhi nga mipanaw na. (ACM/Photos by ROD CONSTANTINO/CIO)