MALAMPUSONG gipahigayon karong adlawa, Oktubre 20 ning tuig sa city hall quadrangle ang ‘4Ps graduation ceremonial turn-over 2022’ alang sa 5,000 ka 4Ps (Pantawid Pamilyang Pilipino Program) beneficiaries kinsa migradwar na isip 4Ps members sa Cagayan de Oro.

 

Atol sa ceremonial graduation sa 120 ka 4Ps members, gipadayag ni Mayor Rolando ‘Klarex’ Uy ang hugot nga suporta sa nasudnong kagamhanan ilabina sa Department of Social Welfare and Development alang sa programa sa 4Ps, ingon man sa kinatibuk-ang ‘poverty alleviation programs’ sa gobyerno.

 

 

“Ayaw mo’g kabalaka ug ayaw ninyo ikaguol kay dili mo nako talikdan sa mga higayon nga kamo magkinahanglan. Ampingi ninyo inyong nakab-ot nga kalampusan pinaagi sa programa sa 4Ps”, saad sa mayor ngadto sa mga migradwar nga benepisyaryo.

 

Personal usab nga misaksi sa ‘graduation’ gikan sa kaulohan ug nag-representa kang DSWD Secretary Erwin Tulfo si Director Gemma Gabuya, ang 4Ps National Program Manager.

 

 

Nagpasalamat si Director Gabuya kang Mayor Klarex ug sa burokrasya sa LGU-CDO sa makanunayong suporta sa programa sa 4Ps, ingon man sa tanang miyembro sa City Interagency Council, konseho, mga civil society organizations, private institutions ug tibuok komunidad.

 

Gibutyag ni Dir. Gabuya nga ang pag-gradwar nagpasabot nga nakab-ot na ang ‘short-term’ nga tumong sa programa nga adunay ‘healthy’ nga kabataan nga nakalampos sa pagtuon.

Sa 120 ka mga pamilya nga migradwar sa 4Ps, adunay 104 kanila ang nakapalampos sa ilang mga sakop sa high school ug 110 usab ang nakapahuman sa kolehiyo.

 

“4Ps breaks the intergenerational cycle of poverty through health and education as our human development indicators” sigon pa ni Dir. Gabuya.

 

 

 

Lakip sa mitambong sa kalihukan ang mga personahe sa DSWD-X pinangulohan ni Regional Director Ramel F. Jamen ug Assistant Regional Director for Operations Ronald Ryan Cui, City Councilor Joyleen Mercedes L. Balaba, chairperson sa Committee on Social Services sa 20th city council, Councilor Maria Lourdes S. Gaane, Councilor Imee Rose P. Moreno, Councilor Edgar Cabanlas, CSWD consultant Pastor Dimver Andales, acting CSWD officer Anecia Tongson, CIAC, department managers sa city hall, pribadong sector ug uban pa. (AGP/Photos by Rod Constantino/CIO)