15 ka paresan gikasal ni Mayor Klarex atol sa 'Kasalan ng Bayan', Oktubre 21, sa Barangay Besigan, ning siyudad.

 

Atol sa maong selebrasyon, gipasalamatan ni Mayor Klarex ang barangay council sa Barangay Besigan sa pagpangulo ni Punong Brgy Jason Magay sa suporta niini sa LGU-CDO aron madala ang Kasalan ng Bayan sa ilang barangay.

 

"Salamat sa atong Kapitan Jason Magay uban sa konseho sa barangay Besigan nga nagpahigayun niining Kasalan ng Bayan nga gitinguha gyud nila nga mahatagan mo og kahigayunan nga magkahiusa bisan tuod aduna mo'y kinaugalingong kasal diri sa tribu pero inyo gihapong gitagaan og kahigayonan ang pagkasal pinaagi sa gobyerno."

 

Gipasalamatan usab sa mga magtiayon si Mayor Klarex Uy tungod sa maong inisyatiba.

 

"Nagpasalamat gyud ko sa imo Mayor Klarex kay kaming mga Lumad, kasal nami sa tribu, pero 'di man gyud maayo makasal na wala'y marriage certificate," sa pamahayag sa magtiayong Lito Hundilay ug Maylen Minister.

Ang maong magtiayon maoy pinakadugay nga nag-ipon sulod sa 25 ka tuig ug adunay 9 ka anak. Sila nakadawat og pahalipay gikan kang Mayor Klarex Uy nga balor og P10,000.

 

 

Ang Brgy Besigan pinuy-anan sa Indigeous People ug daghan kanila ang gikasal na sa tribu. Gani, mipasundayag sa usa ka sayaw ang mga representante sa IPs sector isip pahinungod alang sa mga kaslonon.

 

Lakip sa nadawat sa mga kinasal ang libre’ng cake, lechon ug wine gikan sa mayor, lakip libreng 5-kilo nga bugas gikan ni City Councilor Roger Abaday ug groceries gikan ni Liga ng mga Barangay president Alam Lim.

 

Mitambong sa kasalan isip principal sponsors sila si City Councilor Atty. Edgar Cabanlas; Ian Mark Nacaya; Jay-Roa Pascual, Imee Moreno ug City Administrator Atty.Roy Hilario P. Raagas.

 

Ang Kasalan ng Bayan usa sa mga serbisyo atol sa 'Klarex nga Serbisyo sa Baryo (KSB)' ubos sa administrasyon ni Mayor Klarex Uy. (NLB/CIO/photos by Rod Constantino/CIO)