Gatusan ka mga molupyo sa Barangay Besigan ang naserbisyohan sa nagkadaiyang buhatan sa city hall atol sa gipahigayon nga ‘Klarex nga Serbisyo sa Baryo’ program ni Mayor Rolando Klarex’ Uy adlaw’ng Sabado, Oktubre 22.

 

Pipila sa mga buhatan mao ang City Housing & Urban Development Department (CHUDD) diin 56 ka indibidwal ang giatiman sa mga personahi human nagpakisayod kalabot sa housing program sa syudad.

 

Nakahatag usab sa ilang serbisyo ang East-Westbound Terminal and Public Market (EWTPM) sa 128 ka mga molupyo pinaagi sa paghatag og mga utanon, panakot ug uban pa, ingon man nahatagan og kahibalo kalabot sa Black Soldier Fly.

 

Anti-rabies vaccination, livestock ug poultry deworming, paghatag og vitamins, pagtambal sa mga mananap ingon man konsultasyon ang serbisyo nga gihatag sa City Veterinary Office ngadto sa 88 ka pet owners ug mag-uuma.

 

Dili mominos 13 ka indibidwal ang na-profile sa mga personahi sa City Economic Enterprises Department (CEED) aron mahatagan og kahigayonan nga makapamaligya sa kamerkaduhan.

 

Naatiman usab sa Roads and Traffic Administration (RTA) ang unom ka drayber nga adunay kalapasan sa balaod trapiko ug uban pa nga problema kalabot sa ilang lisensya.

 

Wala palabya sa mga molupyo sa Brgy. Besigan ang kahigayonan nga makaangkon og nagkadaiyang seedlings nga gidala sa buhatan sa Agricultural Productivity Office (APO) aron ilang matanom.

 

Samtang nagkadaiyang serbisyo usab ang nahatag sa Cagayan de Oro City Police Office (Cocpo) ngadto sa 134 ka molupyo lakip mga bata, ug ang buhatan sa Bureau of Fire Protection (BFP 10) pinaagi sa paghatag og mga kasayuran kalabot sa paglikay sa sunog ug sa angay buhaton kung mahitabo ang sunog, ug uban pa nga mga serbisyo ngadto sa 90 ka indibidwal. (ALR/CIO/Photos by Rod Constantino & Roel Felicitas/CIO)