MALAMPUSONG gitapos ang Rotary Youth Week, Nobyembre 11, diha sa Session Hall ning siyudad human gipahigayon ang usa ka mock session nga gidumala mismo sa mga Rotary Youth city officials pinangulohan ni youth city vice mayor Jennica Yvonne S. Lago sa Bayabas National High School.

 

Kini gisundan sa usa ka hamubo nga programa diin gitambongan mismo ni Vice Mayor Bebot Rodriguez, mga miyembro sa 20th city council, mga department managers sa nagkadaiyang buhatan sa LGU-CDO, mga representante sa Rotary Club of Cagayan de Oro, ug Department of Education.

 

Atol sa hamubong programa, mipasundayag sa ilang talento ang mga student-leaders pinaagi sa dance ug song performances.

 

Gihatagan usab sila sa certificate of participation gikan sa Rotary Club of Cagayan de Oro samtang gihatagan sa certificate of appreciation ang mga buhatan sa city hall, Oro Youth Development Office, City Council, Sangguniang Kabataan Federation Office, ug City Council for the Protection of Children, lakip na ang Department of Education-Division of Cagayan de Oro City kinsa miabag ug naningkamot aron magmalumpuson ang maong kalihokan.

 

Mihatag usab sa ilang mensahe sila si Rotary Club of Cagayan de Oro President Isidro Butaslac Jr., City Councilors Romeo Calizo ug Suzette Magtajas-Daba ug Rosalio R. Vitorillo, Ph.D. kon Chief Education Supervisor School Governance and Operations Division sa Department of Education-Division of Cagayan de Oro City.

 

Sulod sa usa ka semana, ang mga student-leaders gibansay kalabot sa Parliamentary Procedure, Ordinance & Resolution Making, Psychosocial First Aid Training ug Fighting Misinformation.

Ning tuig, ang tema sa Rotary Youth Week mao ang mental health ug fighting misinformation. (NLB/CIO/photos by Rod Constantino and Jay Arancon/CIO)