Mahinungdanon ang kusganong panaghiusa tali sa barangay ug kagamhanang lokal sa Cagayan de Oro aron mas epektibong maalagaran ang katawhan ilabina panahon sa kalisdanan ug katalagman.

 

Kini ang giluwatang pamahayag ni Mayor ‘Klarex’ Uy atol sa iyang pagtambong sa pagpakayab sa nasudnong bandila kauban ang mga katawhan, empleyado, ug opisyales sa barangay Pagatpat sa pagpangulo ni Kapitan Roel ‘Bebot’ Gabo, Nobyembre 15 ning tuig.

 

“Gusto ko nga kanunay magkuyog ang dakbayan ug ang barangay kay walay laing dalangpanan ang barangay kondili ang kagamhanan ra usab sa dakbayan”, saysay ni Mayor Klarex.

 

Sa iyang kabahin, mapasalamaton usab si Kapitan Gabo sa suporta ni Mayor Klarex alang sa pagpalambo sa barangay Pagatpat diin tipik niini ang paghangyo og luna kung asa itukod ang ‘fire station’.

 

Mapasalamaton usab si Mayor ‘Klarex’ sa suporta sa konseho sa dakbayan tungod sa pag-aprubar sa ‘usufruct agreement’ alang sa nasangpit nga katuyuan.

 

Dumduman gigahin ni Mayor Klarex ang adlaw’ng Martes matag semana aron personal nga motambong sa ‘flag raising activities’ sa mga barangay, diin bitbit usab niini ang 500 ka mga ‘food packs’ nga gi-andam sa City Social Welfare and Development alang sa mga target nga benepisyaryo sa barangay. (AGP/Photo by Rod Constantino/CIO)