MOHATAG si City Mayor Rolando ‘Klarex’ Uy og dugang P5 milyones nga balor sa mga proyekto alang sa barangay Cugman, gawas sa pasiunang P5 milyones nga una nang nahatag sa syudad sa nahisgutang barangay.

 

Kini ang gibutyag ni Mayor Klarex atol sa iyang pagtambong sa pagpakayab sa nasudnong bandila sa Cugman covered court sa pagpangulo ni Punong Barangay Wendelyn Escobia, mga sakop sa konseho sa barangay, mga empleyado ug katawhan, Nobyembre 22 ning tuig.

 

Giawhag sa mayor nga suportahan ang tanang programa sa dakbayan, lakip na ang ‘Klarex nga Serbisyo sa Baryo’, usa ka nag-unang community outreach program sa syudad nga nagtanyag og ‘Kasalan ng Bayan’.

 

Lakip sa gilaraw ni Mayor Klarex nga mahimong ‘city-paid’ ang pipila ka mga Barangay Health Workers ug Barangay Nutrition Scholars sa barangay Cugman isip pag-ila sa ilang serbisyo sa katawhan ug komunidad, ilabina sa natad sa panglawas. (AGP/Photo by Jay Arancon/CIO)