Friday, 25 November 2022 02:16

538 KA MGA BIKTIMA SA SUNOG UG BAHA SA CDEO NAKADAWAT OG TABANG-PINANSYAL GIKAN DSWD

Written by
MALIPAYON ang 538 ka mga biktima sa sunog ug baha gikan sa nagkadaiyang barangay sa Cagayan de Oro human midawat og cash assistance nga balor og P10,000 matag usa alang sa mga nasunogan, samtang P5,000 usab alang sa mga nabahaan.
 
Nangulo si Majority Floor Leader Ian Mark Nacaya, kinsa maoy nag-representar kang Mayor Klarex Uy, ug kadagkoan sa DSWD 10 ug CSWD sa pag-apod-apod og financial assistance kon tabang pinansyal gikan sa Department of Social Welfare and Development atol sa gipahigayon nga Assistance to Individuals In Crisis Situations kon AICS payout ubos sa inisyatiba ni Senator Bong Go, Nobyembre 24, diha sa city hall quadrangle, ning siyudad.
 
May be an image of 8 people, people sitting, people standing and headscarf
 
Ang payout nahimong posible uban sa pagpaningkamot sa mga personahe sa buhatan ni Senator Bong Go, uban sa CSWD pinangunahan ni Acting CSWD Officer Annie Tongson ug CSWD Community Social and Development Division Head Joan Acraman, lakip mga personahe sa DSWD X sa tumong nga makahatag og alibyo sa kinabuhi sa mga nasunogan ug nabahaan bisan pa man sa ginagmay nga pamaagi.
 
Sumala pa ni Lea Javier, molupyo sa barangay Puerto kinsa nasunogan niadtong Oktobre 31: "Dako kaayo akong kalipay. Salamat sa Ginoo nga naay iyang gipanggamit nga mga tao aron maabot ang tabang kanamo nga mga biktima sa sunog,"
 
Ang mga biktima gikan sa barangay Bugo, F.S. Catanico, Cugman, Puerto, Tablon ug Gusa.
 
Gawas sa cash assistance, midawat ang mga biktima og food packs ug pipila ka pahalipay nga giagi sa raffle gikan ni Senator Bong Go sama sa bisikleta, relo, rubber shoes, cellphone ug uban pa.
 
"Ang sunog intawon wala tuyoa apan gakahitabo. Ang atong gobyerno local ug nasyonal, si Senator Bong Go ug Mayor Klarex Uy gapaningkamot aron masuportahan ang atong mga kaigsoonan sa bisan unsang paagi,” saysay ni City Councilor Nacaya.
 
Anaa usab si CSWD Executive Overseer Pastor Dimver Andales, DSWD X Chief Administrative Officer Bellene Larena Ahmad, ug Barangay FS Catanico Punong Barangay Elpedio Neri. (NLB/CIO/photos by Jay Arancon/CIO).