GISIRADO na sa buhatan sa City Veterinary Office adlaw’ng Lunes, Nobyembre 28, 2022 ang registration link para sa pagkapon ug paglaygit kon spay and neuter sa mga binuhing iro ug iring.

Nasayran nga adunay 201 ka mga pet owners ang malampusong naka-parehistro subay na usab sa gitagana sa maong buhatan nga dawaton alang sa maong kalihukan.

 

Subay niini, gipasabot ni City Veterinarian Dr. Perla Asis nga duha lamang ka pets matag tag-iya ang ilang gitugotan aron mahatagan og higayon ang ubang pet owners nga makapahimulos sa libreng pagkapon.

 

Dugang pa niini, mihatag usab ang maong buhatan sa pipila ka mga gabayan ug rekomendasyon nga angay sundon sa mga pet owners, sama na lamang sa mosunod:

• Dili paghatag ug pagkaon sa ilang binuhing iro ug iring 8 ka oras ayha ang operation

• Dapat himsug ang binuhing hayop atol sa maong operasyon

• Gibawal sa castration ug laygit ang mga buntis nga mga binuhi

• Anaa dapat sa sakto nga edad ang mga binuhing hayop, ang babae nga iring nag-edad sa 4 months pataas, 6 months alang sa lalaki ug adunay timbang nga 1 kg pataas ug alang sa mga iro, 6 months old pataas alang sa babae o lalaki.

 

Gipahinumduman usab ang mga pet owners nga ‘first come-first serve basis’ kini nga proseso, hinungdan nga gihangyo sa City Vet ang pasensya diha sa paghulat nga matawagan alang sa confirmation sa schedule.

 

Subling buksan sa City Vet ang request form sa higayon nga maserbisyohan na ang tanan nga unang nakahatag sa ilang request. (AMTB/CIO Photos by City Vet)