Hugot nga gipadayag sa Night Market Team nga gipangulohan ni Mayor Rolando `Klarex’ Uy nga kadtong na-profile nga mga sidewalk vendors nga wala moadto ug namaligya sa bag-ong puwesto pulihan sa laing vendors nga interesado apan anaa nalista sa second priority.

 

Una nang gipahibalo ni kanhi Kagawad Enrico Salcedo, overseer sa Night Market Team, nga kung dili mamaligya sulod sa tulo ka adlaw sa pwesto nga gihatag kanila ang na-profile nga mga sidewalk vendors, pulihan kini ilabina nga adunay kapin 600 ka mga vendors nga anaa sa second priority nga wala naapil sa raffling ang nagpaabot nga mahatagan og puwesto.

 

 

Gani, sugdan na sa Team karong hapon ang pagsusi sa mga puwesto ug kung makita nga bakante kini ug masuta usab nga wala kini baligya-I, ihatag kini sa laing vendors.

 

Nasayran sa Team nga ubay-ubay sa mga sidewalk vendors nga na-profile ang wala ni-apil sa raffling kay dili sila gusto mobalhin ug magpabilin sa naandan nila nga puwesto.

 

Si Mayor Klarex, sa iyang bahin, namahayag atol sa orientation sa mga sidewalk vendors nga dili na usab niya hatagan sa higayon ug tugutan nga makabaligya ang mga sidewalk vendors nga mosupak sa gabayan ug balaod sa syudad. (ALR/CIO/Photos by Reynan Baylin/CIO)