GIPASIDUNGGAN sa usa ka telecom company ang dakbayan sa Cagayan de Oro sa “Excellence in Digital Ecosystem Innovation Award” tungod sa mga inobasyon niini kalabot sa online platforms sa pagkolekta sa buhis.

 

Ang maong award gidawat ni City Management Information Systems Officer Zelfred Anthony Cocon ug Assistant City Treasurer Engr. Leonil Mistula atol sa awarding ceremony sa GCash Digital Excellence Awards 2022 niadtong Disyembre 1.

 

Ang duha ka opisyal maoy mirepresentar kang Mayor Klarex Uy atol sa awarding ceremony diin giila sa Globe GCash ang dakbayan isip usa sa mga syudad sa nasud ug organisasyon sa gobyerno nga nagpatuman sa online transactions gamit ang GCash aron mapasayon ug haruhay ang pagbayad sa buhis.

 

Ang nasangpit nga award malipayong gipresentar ni Engr. Mistula ug Cocon sa buhatan ni Mayor Klarex kagahapong adlawa, kinsa nagpasalamat sa nakab-ot nga kalampusan sa opisina sa City Finance ug CMIS sa natad sa digital tax payment. (CIO)