“Ampingi ninyo ang kahigayonan nga nahatagan kamo og balay ug kasigurohan nga dili na kamo papahawaon”.

 

Kini ang pamahayag ni Mayor Rolando `Klarex’ Uy ngadto sa 53 ka benepisyaryo sa socialized housing program sa syudad human sila nahatagan og entry pass adlaw’ng Martes, Disyembre 6, 2022.

 

Ang maong kalihokan gipasiugdahan sa City Housing and Urban Development Department (CHUDD) pinangulohan ni Atty. Joeffrey D. Namalata, acting dep’t manager sa CHUDD.

 

Nunot niini, gipasalamatan usab ni Mayor Klarex ang mga personahi sa CHUDD tungod sa paspas nga pag-atiman sa mga benepisyaryo aron makabaton og desenteng pinuy-anan.

Nasayran nga ang mga benepisyaryo mga pamilya nga nanimuyo sa nagkadaiyang estero ug creek ning syudad nga naapektuhan sa Hapsay Sapa project.

 

Sa iyang mensahi, gipahalipayan ni City Councilor Edgar Cabanlas, chairman sa Committee on Urban Poor, ang mga benepisyaryo nga nakaangkon na og kaugalingong balay.

Ang maong mga pamilya didto mobalhin sa relocation site sa NHA Mambuaya. (ALR/CIO/Photos from CHUDD)