Tuesday, 13 December 2022 01:50

INNOTECH COMPANY MITANYAG SA ILANG SERBISYO DINHI SA SYUDAD

Written by
Dako ang posibilidad nga konsiderahon ni Mayor Rolando `Klarex’ Uy ang gitanyag sa Innotech Waste Management Company nga waste water treatment facility nga nahimutang sa Sitio Cabula, Barangay Lumbia alang sa Septage Management Program sa syudad.
 
Sa ilang presentasyon, gipadayag ni Geofry Abroguena, general manager sa Innotech, nga walay financial ug commercial nga obligasyon ang syudad sa Cagayan de Oro kay existing ug operational na usab ang ilang kompanya.
Siya midugang nga tanang gasto sa himoon nga improvement sa pasilidad aron makab-ot ang gi-required nga volume capacity sa septage waste treatment and disposal sa syudad abagahon sa Innotech Waste Management Company.
 
Nasayran nga tanang local government units sa nasud ilabina ang mga dagkong syudad obligado nga magbaton niini nga pasilidad basi sa gabayan sa Department of Environment and Natural Resources (DENR). Gani, gipangitaan na ang syudad sa maong pasilidad.
 
Ang maong tanyag positibo nga gikonsiderar ni Mayor Klarex diin iyang gihangyo ang buhatan sa City Local Environment and Natural Resources Office (Clenro) pinaagi ni Dep’t Manager Engr. Armen Cuenca nga tun-an ang tanyag ug magpahigayon og laing panagtagbo tali sa mga personahi sa Innotech.
 
Alayon niini, gipasalamatan ni Mayor Klarex ang Innotech sa pagtanyag sa ilang pasilidad nga libre ngadto sa syudad. (ALR/CIO/Photos by Jomar Figuracion/CIO)