DAKONG kalipay ang gibati sa 115 ka magtiayon human gikasal ni Mayor Klarex Uy atol sa ‘Kasalan ng Bayan’, Disyembre 10, diha sa barangay Gusa covered court ning siyudad.

 

Sumala pa ni Mark Anthony Bacarissas ug Thezza Ybañez, usa sa mga kinasal, dako kini nga pabor sama kanila nga Indigenous People. "Nalipay ko. Dakong pasalamat sa gobyerno sa City Hall, kang Mayor, sa tanan nagpaluyo ug nangulo ug naghatag suporta. Sa amo nga side nga nabutang sa Indigenous nga dili kaya magpasigarbo og kasal. Dako kaayo ni nga pabor sa amoa," saysay sa magti-ayon.

 

Si Thezza lima ka bulan nga buros sa ikaduha nilang anak. Sila nag-ipon sulod sa 11 ka tuig.

 

Nasayran na ang maong kasal personal nga gihangyo ni Punong Barangay Marlo Tabac sanglit Disyembre 10 usab ang pagbukas sa mga kalihokan sa ‘Araw ng Gusa’.

 

 

Nagsilbing principal sponsors sila City Councilors Girlie Balaba, Atty. Ed Cabanlas, Dra. Malou Gaane, Jay Roa-Pascual, Suzette Magtajas-Daba, Roger Abaday, Sangguniang Kabataan Federation President John Michael Seno ug Liga ng mga Barangay President Alam Lim.

 

Mitambong usab si City Administrator Atty. Roy Hilario Raagas, barangay Council sa Gusa pinangunahan ni Punong Barangay Marlo Tabac ug mga personahe sa buhatan nga nagpaluyo niini ang City Civil Registry, City Mayor's Office, Community Improvement Division, City Information Office ug City Public Services Department.

 

Ning tuig, ang barangay Gusa ang pinakadaghang magtiayon nga nakapahimulos sa ‘Kasalan ng Bayan’ program ni Mayor Klarex Uy, diin ang kada managtiayon midawat og libreng lechon, cake ug wine gikan ni Mayor Klarex Uy, lakip grocery packs gikan ni City Councilor Roger Abaday ug lima ka kilo nga bugas gikan ni SK Federation President John Michael Seno. (NLB/CIO/Photos by Wowel Condeza and Rod Constantino/CIO)