Sa tinguha nga mahatagan og higayon ingon man kaangayan ang tanang seasonal vendors nga makapamaligya matag Disyembre, giplastar sila ni Mayor Rolando `Klarex’ Uy diha sa may Rotunda area sa Rodelsa Circle.

 

Ang baligya ning maong mga vendors mao ang mga Christmas decorations, prutas, ug dulaan diin ang naandan nila nga puwesto ang dalan sa J.R. Borja atubangan sa Ororama.

Gani, mao usab kini ang ilang gusto ug gihangyo sa mayor nga magpabilin gihapon sa ilang naandan nga puwesto.

 

Apan gipasabot sila ni Mayor Klarex nga walay gitugutan nga mamaligya sa dalan JR Borja aron dili maghuot ang trapiko ug maperhuwesyo ang katawhan.

Matud sa mayor nga dili lang ang kaayohan ug seguridad sa mga vendors ang iyang gilantaw apan lakip na ang kinatibuk-ang katawhan.

 

Nasabtan sa grupo sa mga vendors ang desisyon ni Mayor Klarex ug sila nagpasalamat sa higayon nga gihatag kanila ilabina nga gipadayag sa mayor nga sila ra gihapon nga grupo ang tugutan nga mamaligya sunod tuig ug dili na dugangan. (ALR/CIO/Photos by Reynan Baylin)