DUHA ka pasyente nga taga-Cagayan de Oro nga anaa karon sa Northern Mindanao Medical Center nasubay pinaagi sa mas gipalapdan nga 'contact tracing' sa BHERTs kon Barangay Health Emergency Response Teams, sumala ni Dr. Lorraine Nery, acting city health officer ug nangulo sa Emergency Operation Center.

Sa pagkakaron, nakuhaan na sa 'swab sample' ang duha og naghulat na lang sa resulta sa test.

Gipatutokan ni Mayor Oscar Moreno ang 'contact tracing' pinaagi ni Dr. Teodulfo Joselito Retuya, epidemiologist sa City Health Office kinsa maoy nangulo sa 'contact tracing' team.

Gani, giduso ni Mayor Moreno nga bansayon ang mga sakop sa barangay aron matudloan sa pamaagi ug sistema sa 'contact tracing'.

Kahibaloan ang ‘contact tracing’ mahinungdanon aron masuta o masubay ang source o tinubdan sa virus ug gilayong mapugngan ang pagkatag niini.

Alayon niini, gibutyag ni Dr. Nery sugod Marso 30 ipahigayon na usab ang ikaduhang hugna sa house-to-house profiling sa mga BHERTs, midwives, BHW, BNS ug uban pang personahe aron masuta ang 'health condition' sa mga tawo sa matag panimalay.