HUMAN sa usa ka bulan nga nakasinati og pagsaka sa kaso sa COVID 19 cases ang Cagayan de Oro, mitala karon og zero case ang syudad basi sa datos sa City Health Office.

 

Kahinumdoman nga mitala na lamang og 1-digit case matag adlaw ang Cagayan de Oro pagsugod sa bulan sa Disyembre, ug mikunhod gayud ang ihap sa mga nataptan sa COVID virus bisan pa man og miabot na sa kapin 100 ang natala sa syudad sa milabay’ng bulan.

 

Apan bisan pa man niini, kanunay nga naghangyo si Mayor Rolando “Klarex” Uy ug ang mga opisyales sa City Health Office sa publiko nga magmatngon ug magsunod kanunay sa minimum public health standards luyo sa mga panagtapok ug kasadya sa pagsaulog sa kapaskohan.

 

Samtang, gipahibalo usab sa City Heath Office nga hangtud na lamang Disyembre 30 ning tuig ang libre’ng pagpamakuna lakip booster shots batok COVID 19 basi sa pahimangno usab sa Department of Health.

Busa, giaghat ang tanan ilabina ang wala pa nakapa-booster nga mobisita na sa mga vaccination centers aron malikay sa grabeng simtomas kun ugaling mataptan sa COVID 19 virus. (ACM/CIO)