Friday, 23 December 2022 07:49

MGA BENEPESYARYO SA JOBSTART PHILS WAVE 7, MIGRADWAR NA

Written by
MALAMPUSONG gipahigayon kagahapon, Disyembre 22 ning tuig ang full cycle graduation sa JobStart Philippines Wave 7, usa ka programa nga naghatag og career coaching, life skills & technical training ug internships sa mga kabatan-onan nga gipasiugdahan sa Department of Labor & Employment, kaabag ang kagamhanang lokal sa Cagayan de Oro pinaagi sa Job Placement Bureau – Public Employment Service Office ug mga partner companies.
 
Sigon ni PESO manager Ms. Kathleen Kate Sorilla sa 100 ka mga benepesyaryo sa programa, 35 kanila ang nakakita na og trabaho human sa life skills training, 15 ang ‘hired on the spot’, samtang 14 ang gi-absorb sa partner employers.
Usa lang si Ms. Mylin Embodo, 23, ang nakapahimulos ug nakakita og disenteng trabaho sa usa ka hotel pinaagi sa programa.
 
Mapasalamaton si Embodo sa programa ug sa oportunidad nga mabansay ug mahimong ‘competent’ sa corporate world.
 
Atol sa kalihukan, gitimbaya ni city administrator Atty. Roy Hilario Raagas ang mga migradwar sa programa, dungan ang pagpasalig sa suporta sa administrasyon ni Mayor Rolando ‘Klarex’ Uy sa programa alang sa paghatag og job employment opportunities sa kabatan-onan. (AGP/Photos by Roel Felicitas/CIO)