Tungod sa nasinating pagbaha, nagpadala gilayon ang kagamhanan sa Cagayan de Oro ubos sa pamunoan ni Mayor Rolando "Klarex" Uy og mga hinabang alang sa mga biktima sa baha didto sa probinsya sa Misamis Occidental.

 

Usa ka joint team nga gilangkoban sa 31 ka mga personahe gikan sa City Disaster Risk Reduction and Management Department (CDRRMD), City Social Welfare and Development Office (CSWD), City Information Office ug City Engineering Office ang mibiyahe Martes sa hapon padulong sa Misamis Occidental dala ang mga relief goods, mga tambal ug medisina ug uban pang donasyon alang sa mga biktima sa baha sa maong probinsya.

 

 

Ang mga relief goods naglakip na sa 50 ka sako sa bugas, 50 ka kahon sa instant noodles, 50 ka kahon sa sardinas, 50 ka kahon sa beef loaf, 50 ka kahon sa corned beef, lakip 200 ka habol, 200 ka banig, 200 ka mosketiro ug mga kitchen utensils.

 

Gawas pa niini, dala usab sa joint team ang mga tambal ug multivitamins gikan sa City Health Office ug JR Borja General Hospital (JRBGH), lakip ang mga donasyon gikan sa mga pribadong indibidwal. (IAF/CIO)