Thursday, 29 December 2022 04:32

7 KA BAG-ONG RESCUE VEHICLES GITUNOL NI MAYOR KLAREX SA MGA BRGY SA KABUKIRAN

Written by
Pito ka mga barangay sa kabukiran sa distrito uno sa dakbayan sa Cagayan de Oro ang nakabaton matag usa og bag-ong 4x4 Toyota Hilux rescue vehicles gikan sa administrasyon ni Mayor Rolando Klarex Uy nga nagbalor og kapin P11 milyones gikan sa local disaster funds.
 
May be an image of 9 people, people standing and indoor
 
Si Mayor Klarex Uy namahayag nga bililhon ug dako’g ikatabang sa mga opisyales sa barangay ang pagbaton og rescue vehicles, ilabina gayud sa paghatud sa mga pasyente padulong sa balay-tambalanan ug pag-responde panahon sa emerhensya.
 
Sa kanhi kapitan pa siya sa barangay, dugang pa sa mayor nga iyang nasinatian ang kapait ug kalisdanan kung adunay mga pasyente nga magsakit ug magpatabang sa barangay apan dili gilayon madala sa ospital tungod kay walay masakyan nga emergency transport vehicle.
 
Ang pito ka rescue vehicles pormal nga gitunol ni Mayor Klarex Uy, kauban si Nick Jabagat, ang department manager sa City Disaster Risk Reduction Management Department (CDRRMD), atol sa usa ka simpleng turnover ceremony diha sa City Tourism Hall, Huwebes, Disyembre 28.
 
Ang mga barangay nga nakadawat sa bag-ong rescue vehicles mao ang Tignapoloan, Tagpangi, Taglimao, Besigan, Pagalungan, Tuburan, ug Tumpagon. (IAF/photos by Rod Constantino of CIO)