Sa unang flag raising sa city hall karong adlawa, Enero 3, 2023, 18 ka mga benepisyaryo sa land titling program sa syudad ang gitunulan ni Mayor Rolando `Klarex’ Uy og titulo sa yuta pinaagi sa inisyatiba sa Task Force Emancipation for Piso-Piso Beneficiaries (TFEPB).

 

Matud ni TFEPB Executive Director Engr. Armen Cuenca nga gikan sa Macanhan, Barangay Carmen nga ubos kanhi sa Piso-Piso site ug Piso-piso program nga gipaningkamutan sa syudad nga mahatagan og titulo ang mga benepisyaryo.

Alayon niini, gipasalamatan ni TFEPB Chairman Kag. Edgar Cabanlas si Mayor Klarex nga padayong naghatag og seguridad sa pagpuyo sa mga benepisyaryo.

 

Nagpasalamat usab kang Mayor Klarex ang mga benepisyaryo sa maong kahigayonan diin sa taas nga panahon sa ilang pagpuyo sa maong luna hingpit na gayud nilang napanag-iya human ilang nadawat ang titulo sa yuta.

Samtang, gipahalipayan ni Mayor Klarex ang mga benepisyaryo nga nakabaton na og seguridad sa pagpuyo pinaagi sa maong titulo.

 

Gipasalamatan usab sa mayor ang mga personahi sa TFEPB nga maoy naglihok ug naningkamot nga maserbisyohan ang mga benepisyaryo aron maangkon ang titulo sa ilang yuta.

 

Lakip sa gitunol ni Engr. Cuenca ang tulo ka mga titulo sa yuta nga gipanag-iya sa syudad ug kini mao ang luna nga gitukuran sa buhatan sa Department of Agrarian Reform (DAR-10), Carmen National High School, ug ang gigamit sa mga Former Rebels (FRs) nga gitukuran sa ilang livelihood building nga pulos nahimutang sa Macanhan. (ALR/CIO/Photos by Jomar Figuracion/CIO)