Wednesday, 04 January 2023 04:39

MGA JOB ORDER UG CASUAL WALA GITANGTANG – MAYOR KLAREX

Written by
Gitin-aw ni City Mayor Rolando ‘Klarex’ Uy nga sukwahi sa mga taho ug hugon-hugon, wala siya’y gitangtang nga job order ug casual nga mga kawani sa city hall.
 
Atol sa flagraising ceremony Lunes sa buntag, gipasabot ni Mayor Klarex nga dili niya batasan ang pag-dismiss sa mga JO ug casual tungod kay nakasabot siya sa kalisud sa kinabuhi sa matag usa, ilabina kadtong adunay mga estudyante.
Giklaro sa mayor nga ang kontrata sa mga JO ug casual mihupas na kon mi-expire niadtong Disyembre 31, ug nanginahanglan kini og renewal sa buhatan sa mayor aron madawat pagbalik sa trabaho
 
“Nasayod man sila (mga JO ug casual) nga kutob lamang sa Disyembre 31 ang ilang kontrata”, dugtong pa ni Mayor Klarex, kinsa mag-agad gihapon sa evaluation ug rekomendasyon sa mga department managers alang sa renewal sa mga JO ug casual.
 
Hinoon, gihatagan ni Mayor Klarex og ‘temporary exemption’ ang mga casual ug job order sa 12 ka mga buhatan ug opisina sa city hall kansang mga serbisyo ang nalambigit sa medical, health, disaster response, peace and order, traffic management, sanitation, engineering ug public cemetery ug uban pa.
 
Kini mao ang City Health Office, City Health Insurance Office, JR Borja General Hospital, Roads and Traffic Administration (RTA), Civil Security Unit, City Isolation Unit ubos sa mayor’s office, City Social Welfare and Development Department, City Disaster Risk Reduction Management Office, City Local Environment and Natural Resources Office, City Public Services Office, City Engineers Office ug Mayor’s Office.
 
Lakip usab sa ‘temporary exemption’ ang Business Process Licensing Division (BPLD) ug Office of the Building Official (OBO) tungod sa tinuig nga annual business permit renewal diha sa City Tourism Hall. (IAF/CIO)