Bisan pa man og humana ang kasaulogan sa pasko ug pagtabo sa bag-ong tuig, apan wala pa gihapon nahunong ang paghatag og pahalipay ni Mayor Klarex Uy alang sa mga kawani sa city hall.

 

Nahugyaw ang mga empleyado sa city hall nga mitambong sa flagraising niadtong Martes human gianunsyo ni Mayor Klarex nga makadawat karong sunod semana ang matag empleyado sa syudad og dugang bonus nga mobalor og P10,000, lakip 25 kilos nga bugas matag usa.

 

Gani, gibutyag ni Mayor Klarex nga giandam na karon sa buhatan sa City Finance Department ubos ni City Treasurer Jasmin Maagad ang pagproseso sa payroll alang sa maong katuyoan.

 

Sa iyang mensahe, si Mayor Klarex nagkanayon nga kalipay niya ang pagpaambit sa mga grasya ug panalangin nga gibubo sa Kahitas-an sa miaging tuig, ug angay lamang nga pasalamatan usab ang mga kawani sa syudad kinsa miabag sa iyang administrasyon diha sa pagpangalagad sa katawhan. (IAF/CIO)