Monday, 09 January 2023 06:29

41 ISFs SA BINONOAN CREEK GI-RELOCATE NI MAYOR KLAREX SA BRGY MAMBUAYA

Written by
Mokabat 41 ka pamilya nga nailang informal settler families (ISFs) nga nanimuyo sa Binonoan Creek Barangay Carmen ang nahatagan og permanenteng pinuy-anan apil livelihood projects ubos sa administrasyon ni Mayor Rolando `Klarex’ Uy.
 
Ang maong mga pamilya nakadawat sa ilang entry pass alang sa ilang bag-ong pinuy-anan didto sa relocation site sa Barangay Mambuaya niadtong Disyembre 6, 2022, sa pagpaningkamot usab sa mga personahi ug kadagkuan sa City Housing & Urban Development Department (CHUDD) pinangulohan ni Atty. Joeffrey Namalata.
 
Nasayran nga niadtong Nobyembre 24, 2022 nagpahigayon og ocular inspection si Atty. Namalata uban sa mga personahi sa CHUDD sa may Binonoan Creek diin mokabat 49 ka ISFs ang natumbok nga nanimuyo sulod sa taas nga katuigan.
 
Tungod sa hangyo ni Mayor Klarex ngadto sa mga department managers nga hatagan og kasulbaran ang problema sa katawhan sa syudad sa tagsa-tagsa ka mga buhatan sa city hall, paspas usab nga gitubag sa CHUDD ang problema sa maong mga ISFs.
 
Duha ka adlaw human nadawat sa mga benepisyaryo ang ilang entry pass nakabalhin na sila sa ilang pinuy-anan diin dako ang ilang pagpasalamat kang Mayor Klarex sa talagsaong pinaskuhan nga ilang nadawat kay dili na sila matawag nga informal settlers. (ALR/CIO/Photos from CHUDD)