Gidayeg ni Misamis Oriental Provincial Board Member Boboy Sabal ang suporta ni Cagayan de Oro City Mayor Klarex Uy sa ‘Paglaum MisOr-Rise CDO Cup’, Enero 9 diha sa Misamis Oriental Integrated Sports Complex ning syudad.

Ang maong paugnat sa kusog kabahin sa 10th Kuyamis Festival ug 93rd Founding Anniversary sa probinsya sa Misamis Oriental.

 

Sa iyang mensahe, gipadayag ni Sabal ang kalipay nga nakigduyog ang LGU-CDO sa founding anniversary sa lalawigan sa Misamis Oriental.

 

 

"First time in history, 93 years, ang dakbayan sa Cagayan de Oro nilakip pagselebrar sa atong founding anniversary, Mayor Klarex Uy, ang among kinasing-kasing nga pasalamat sa imong pagbukas sa imong kasing-kasing ug mga kamot kay imong giisip ang lalawigan sa Misamis Oriental usa ka partner sa kalamboan, dili lamang sa dakbayan sa Cagayan de Oro, kon dili sa kinatibuk-an Misamis Oriental," saysay ni Provincial Board member Sabal.

 

Pipila ka mga empleyado sa LGU-CDO ang gilauman modula sa maong kalihokan diin sila mosalmot sa lawn tennis, table tennis, chess, lakip na ang dance challenge, battle of the bands ug cheerdance.

 

Kahinumduman nga usa sa nahisgutan sa tigum kon breakfast meeting nga gipahigayun sa miaging tuig tali ni Mayor Klarex ug Governor Unabia ang ‘partnership’ sa Cagayan de Oro ug lalawigan sa Misamis Oriental alang sa planong ‘redevelopment’ sa Pelaez Sports Complex; pagsalmot sa Cagayan de Oro sa Kuyamis Festival activities ug pag-apil sa mga empleyado sa city hall sa ‘Paglaum Cup’. (NLB/CIO/photos courtesy of April Lorenzana/CMO)