NANUMPA bag-ohay lamang atubangan ni Mayor Klarex Uy ang bag-ong natudlo nga hepe sa Office for Senior Citizen Affairs kon OSCA nga si Honorio S. Cervantes.

 

Ang katudloan ni Cervantes gisuportahan ni Social Pension In-charge Carlo S. Wabe Jr., Senior Citizen Supervisor Meriam Caducoy, RSW ug Senior Citizen Focal Person Coleen A. Chavez, RN.

 

Si Cervantes, 73 anyos ug molupyo sa Mindanao Homes, barangay Pagatpat, diin siya nahimong Presidente sa Pagatpat Senior Citizen Associations sulod sa 12 ka tuig ug Board Member sa United Senior Citizen Associations of Cagayan de Oro.

 

 

Siya usab ang kanhi City Police Director sa Cagayan de Oro City niadtong tuig 2005, ug kasamtangang trainor sa Urban Container Household Gardening ug konektado sa Department of Trade and Industry, Department of Agriculture, ug Technical Education and Skills Development Authority (TESDA).

 

Nasayran nga napili si Cervantes atol sa gipahigayon nga general assembly sa mga senior citizen, niadtong Oktubre 24, 2022 sa Limketkai Mall ug magsilbi isip OSCA head sulod sa tulo ka tuig.

 

Ang OSCA usa sa mga section sa City Social Welfare and Development (CSWD) Department nga gipangunahan ni CSWD Officer Anecia Tongson. (NLB/CIO/ Photos courtesy of CSWD and April Lorenzana/CMO)